ചോദ്യം- റമദാനിൽ വിട്ടുപോയ നോമ്പ് ശഅ്ബാനിൽ നോറ്റുവീട്ടാമോ?
ഉത്തരം- റമദാനിൽ വിട്ടുപോയ നോമ്പ് അടുത്ത റമദാന് മുമ്പായി ഏത് മാസത്തിലും നോറ്റു വീട്ടാവുന്നതാണ്. റമദാനിൽ വിട്ട നോമ്പ് നോറ്റുവീട്ടാൻ ഒരു മുസ്ലിമിന്റെ മുമ്പിൽ നീണ്ട പതിനൊന്നു മാസങ്ങളുണ്ടെന്നർഥം. ഇസ്ലാമിക ശരീഅത്ത് നല്കിയ ഒരു സൗകര്യമാണിത്.
ഇതനുസരിച്ച് റമദാനെ തൊട്ടുവരുന്ന ശവ്വാലിൽതന്നെ നോമ്പ് നോല്ക്കാം. ഇതാണ് അത്യുത്തമം എന്ന കാര്യത്തിൽ സംശയമില്ല. കാരണം, സ്വന്തം ജീവിത കാലത്തെക്കുറിച്ച് ആർക്കും നിർണയമില്ലല്ലോ. അതിനാൽ, മുൻകരുതൽ എന്ന നിലയിലും പാരത്രിക ലാഭം പരിഗണിച്ചും ബാധ്യതകൾ എത്രയും വേഗം ചെയ്തു തീർക്കുന്നതാണ് നല്ലത്. ഇനി, പ്രതികൂലാവസ്ഥയോ അനാരോഗ്യമോ കൃത്യാന്തര ബാഹുല്യമോ ഹേതുവായി അതിന് സാധിച്ചില്ലെങ്കിൽ അടുത്ത റമദാനുമുമ്പ് ചെയ്താൽ മതി. അങ്ങനെ ശഅ്ബാനായിട്ടും കടം വീട്ടിയിട്ടില്ലെങ്കിൽ അത് ശഅ്ബാനിൽതന്നെ ചെയ്യണം. കടം വീട്ടാനുള്ള അവധി അതോടെ തീരുകയാണ്. ഉമ്മുൽ മുഅ്മിനീൻ ആഇശ (റ) പലപ്പോഴും ഇങ്ങനെയാണ് ചെയ്തിരുന്നത്. അതിൽ തെറ്റില്ല എന്നർഥം. ഇങ്ങനെ ചെയ്യാമോ എന്ന കാര്യത്തിൽ സംശയമുള്ള ചിലരുണ്ട്. പ്രസ്തുത സംശയത്തിന് ഒരടിസ്ഥാനവുമില്ല. എല്ലാ മാസങ്ങളും റമദാനിലെ വിട്ട നോമ്പ് നോറ്റുവീട്ടാൻ പറ്റിയതാണ്.
https://norgerx.com/levitra-professional-norge.html
