ചോദ്യം: സ്വര്‍ണത്തിന്‍റെ സകാത്ത് ബാധകമാവുന്നത് എത്ര പവന്‍ ഉള്ളപ്പോഴാണ്?
ഉത്തരം:
• സകാത്ത് ബാധകമാവുന്ന ഏറ്റവും കുറഞ്ഞ അളവിന് “നിസ്വാബ്” എന്നാണ് സകാത്തിന്‍റെ സാങ്കേതികഭാഷയില്‍ പറയുന്നത്.
• സ്വര്‍ണ്ണം കയ്യിലുള്ള സ്ത്രീയാണെങ്കിലും പുരുഷനാണെങ്കിലും നിസ്വാബ് എത്തിയാല്‍ സകാത്ത് നല്‍കേണ്ടതാണ്.
• നബി തിരുമേനിയുടെ (സ) കാലത്ത് സ്വര്‍ണത്തിന്‍റെ നിസ്വാബ് 20 ദീനാര്‍ ആണ്.
• ദീനാര്‍ എന്നാല്‍ അക്കാലത്ത് പ്രചാരത്തിലുണ്ടായിരുന്ന സ്വര്‍ണ്ണനാണയം ആണ്. അത് 24 കാരറ്റ് തങ്കം ആണ്.
• നമ്മുടെ കയ്യില്‍ ഉണ്ടാവുന്ന സ്വര്‍ണ്ണ കോയിന്‍, ബിസ്കറ്റ് മുതലായവ 24 കാരറ്റ് തങ്കം ആണ്.
• 20 ദീനാര്‍ ഇന്നത്തെ കിലോഗ്രാം കണക്കില്‍ 85 ഗ്രാം ആണ്.
• അങ്ങിനെ 24 കാരറ്റ് തന്നിത്തങ്കം ആയ 85 ഗ്രാം സ്വര്‍ണ്ണം കയ്യിലുള്ള വ്യക്തി സകാത്ത് നല്കണം.
• 84 ഗ്രാം വരെയും സകാത്ത് നല്‍കേണ്ടതില്ല.
• 85 ഗ്രാം തികയുമ്പോള്‍ അതിനു സകാത്ത് നല്കണം.
• 85 ഗ്രാമോ അതില്‍ കൂടുതലോ എത്ര ഗ്രാം കയ്യിലുണ്ടോ അതിന് മുഴുവന്‍ സകാത്ത് നല്കണം; 85 ഗ്രാം കഴിഞ്ഞുള്ള സ്വര്‍ണ്ണത്തിനല്ല.
• ആഭരണം ഉണ്ടാക്കുവാന്‍ വേണ്ടി ഉപയോഗിക്കുന്നത് 24 കാരറ്റ് സ്വര്‍ണ്ണം അല്ല.
• സാധാരണഗതിയില്‍ അത് 22 കാരറ്റ് സ്വര്‍ണ്ണമാണ്. 20 ഉം 18 ഉം കാരറ്റ് ആഭരണങ്ങളും ഉണ്ടാവാറുണ്ട്.
• ആഭരണത്തിന്‍റെ സകാത്ത് കണക്കാക്കുമ്പോള്‍ ഈ വ്യത്യാസം പരിഗണിക്കേണ്ടതാണ്.
• ഖുര്‍ആനില്‍ സ്വര്‍ണ്ണം എന്നേ പരാമര്‍ശം ഉള്ളൂ. ആഭരണം എന്ന് പ്രത്യേകം ഇളവ് ഖുര്‍ആനില്‍ വന്നിട്ടില്ല.
• ആഭരണത്തിന് സകാത്ത് ബാധകമാണ് എന്ന സ്വഹീഹ് ആയ ധാരാളം ഹദീസുകള്‍ ഉദ്ധരിക്കപ്പെട്ടിട്ടുണ്ട്.
• ധരിക്കുന്ന ആഭരണം, സൂക്ഷിയ്ക്കുന്ന ആഭരണം എന്ന വേര്‍തിരിവ് ചില ഫിഖ്ഹ് ഗ്രന്ഥങ്ങളില്‍ കാണാം.
• സകാത്ത് ഒരു നിര്‍ബന്ധ ഇബാദത്ത് ആയതിനാല്‍, ആഭരണത്തിനും സകാത്ത് നല്‍കലാണ് സൂക്ഷ്മതയുടെ നിലപാട്.
• ആഭരണത്തിന്‍റെ സകാത്ത് കണക്കാക്കുമ്പോള്‍ കാരറ്റ് വ്യത്യാസം പരിഗണിക്കണം എന്ന് മുകളില്‍ പറഞ്ഞു.
• എത്ര ഗ്രാമാണോ ആഭരണം കയ്യില്‍ ഉള്ളത്, അതിനെ 24 കാരറ്റ് ആക്കി കണക്കാക്കണം.
• 15 പവന്‍ (120 ഗ്രാം) 22 കാരറ്റ് ആഭരണം കയ്യിലുള്ള ആളുടെ കണക്ക് ഇങ്ങിനെയാണ്: 120 x 22 / 24 = 110 ഗ്രാം 24 കാരറ്റ്.
• 15 പവന്‍ 18 കാരറ്റ് ആഭരണം കയ്യിലുള്ള ആളുടെ കണക്ക് ഇങ്ങിനെയാണ്: 120 x 18 / 24 = 90 ഗ്രാം 24 കാരറ്റ്.
• 22 കാരറ്റ് ആഭരണങ്ങള്‍ ആണെങ്കില്‍ 92.73 ഗ്രാം ഉണ്ടെങ്കിലേ സകാത്ത് ബാധകമാവൂ.
• നിസ്വാബ് എത്തിയ സ്വര്‍ണത്തിന്‍റെ രണ്ടര ശതമാനമാണ് സകാത്ത് നല്‍കേണ്ടത്.
• 85 ഗ്രാമിന്‍റെ രണ്ടര ശതമാനം 2.125 ഗ്രാം ആണ്. 120 ഗ്രാമിന്‍റെ രണ്ടര ശതമാനം 3 ഗ്രാം ആണ്.
• എത്ര ഗ്രാം സ്വര്‍ണമാണോ കയ്യിലുള്ളത് അതിനെ 2.5 കൊണ്ട് ഗുണിക്കുക, എന്നിട്ട് 100 കൊണ്ട് ഹരിക്കുക. അങ്ങിനെ കിട്ടുന്ന സംഖ്യയാണ് സകത്തായി നല്‍കേണ്ടത്.
📲 വാട്‌സാപ് ഗ്രൂപ്പിൽ അംഗമാകാൻ👉: https://chat.whatsapp.com/CONOJlYnC05Kslg9NygjM1
